Alle husstandar i kommunen har plikt til å vere med i renovasjonsordninga. Dette følger av renovasjonsforskrifta § 2-1 og § 1-2 i Øygarden kommune.

Du kan søke om midlertidig fritak dersom bustaden eller bueininga ikkje skal brukast i ein samanhengande periode på minst 6 månader.

Kven kan få fritak?

Vilkåra for fritak kjem fram av renovasjonsforskrifta § 4-1.

Einebustad

Du kan søke om midlertidig fritak frå renovasjonsordninga dersom bustaden står tom i ein samanhengande periode på minst 6 månader fordi:

• bebuar er bortreist eller har flytta til sjukeheim eller liknande i meir enn 6 månader, og ingen andre skal bruke eller leige bustaden
• bustaden ikkje kan brukast på grunn av rehabilitering eller ombygging, slik at det ikkje er mogleg å bu der, kvile eller lage mat
• bustaden står tom medan eigar aktivt forsøker å selje eller leige han ut
• bustaden er i så dårleg stand at den ikkje kan brukast til bustad
• bustaden i praksis blir brukt som fritidsbustad, og ingen har folkeregistrert adresse der

Ved fritak for bustad som blir brukt som fritidsbustad, blir renovasjonsgebyret endra frå bustadsabonnement til fritidsabonnement. For fritidsbustader som nyttar hyttecontainarar, gjeld berre fast gebyr for hytterenovasjon.

Utleigedel i einebustad

Du kan søke om midlertidig fritak for utleigedel dersom bueininga står tom i ein samanhengande periode på minst 6 månader.

For å kunne få fritak må eitt av desse vilkåra vere oppfylt:

• bueininga står tom, er fråflytta eller er ubueleg i minst 6 månader
• eigar nyttar utleigedelen sjølv som ein del av bustaden

Det siste gjeld bustader der utleigedelen har innvendig tilgang til hovuddelen av huset.

Dersom utleigedelen blir teken i bruk igjen eller leigd ut, må abonnenten melde frå til ØyVAR.

Fritidsbustad

Fritidsbustader kan ikkje vere midlertidig fråflytta. Fritak kan likevel vurderast dersom:

• bygningen er i så dårleg stand at den ikkje kan brukast til opphald
• fritidsbustaden er under rehabilitering eller ombygging i minst 6 månader

Dette gir ikkje grunnlag for fritak

Du kan ikkje få fritak fordi:

• bustaden blir brukt av familie eller andre
• det er lite bruk eller lite avfall
• det er langt til oppsamlingsplass
• bustaden manglar oppsamlingsutstyr
• bustaden har lang veg til næraste oppsamlingseining
• fritidsbustaden blir brukt sjeldan eller aldri
• bustaden eller fritidsbustaden ikkje er isolert
• du har fritidsbustad på same eigedom eller ein anna plass i kommunen
• du ikkje nyttar hytterenovasjonsløysinga
• fritidsbustaden ligg avsides til
• sosiale eller økonomiske forhold gjer det vanskeleg å betale renovasjonsgebyret

Kor lenge varer eit fritak?

Fritak blir som hovudregel gitt for inntil 1 år om gongen.

Varig fritak

Varig fritak blir berre gitt dersom bygningen er:

• riven, eller
• brent ned

For utleigedel kan varig fritak vurderast dersom bueininga er permanent fjerna som eiga bueining. Dette kan til dømes vere aktuelt ved samanføying av bueiningar. Dersom du er usikker på om tiltaket er søknadspliktig etter plan- og bygningslova, kan du kontakte byggesaksvakta i kommunen. Du finn meir informasjon om samanføying av bueiningar hos Direktoratet for byggkvalitet.

Dokumentasjon

Når du søker, må du legge ved dokumentasjon som viser at vilkåra for fritak er oppfylte. Det kan til dømes vere:

• skriftleg stadfesting frå eigar på at bustaden eller bueininga ikkje skal brukast i fritaksperioden
• dokumentasjon på oppussing, rehabilitering eller samanslåing av bueiningar
• stadfesting på opphald i sjukeheim eller liknande
• dokumentasjon på at bustaden står tom medan han er lagt ut for sal eller utleige

Innhenting av spann

Fritak frå renovasjonsgebyr gjeld først når oppsamlingsutstyret (spann/behaldarar) er henta av ØyVAR eller levert inn etter avtale.

Det kan ta litt tid frå søknaden er behandla til spann blir henta. Vi anbefaler derfor å søke i god tid før perioden du ønsker fritak for.

Spann må vere tilgjengeleg for henting. Dersom ØyVAR ikkje finn eller får henta inn oppsamlingsutstyret, kan grunnlaget for fritaket falle bort.

Vilkår for bruk av gjenbruksstasjonar

Fritak frå renovasjon betyr at du ikkje kan bruke gjenbruksstasjonane som ordinær hushaldningskunde i fritaksperioden.

Inngangskvotane til gjenbruksstasjonen blir fjerna så lenge fritaket gjeld.

Dersom du ønsker å bruke gjenbruksstasjonen i fritaksperioden, må levering betalast etter satsane for næringskundar og kundar utanfor kommunen. Dette kjem av at delar av drifta av gjenbruksstasjonane blir finansierte gjennom renovasjonsgebyret.

Meldeplikt ved endringar

Du har plikt til å melde frå dersom vilkåra for fritaket ikkje lenger er oppfylt. Dette følger av renovasjonsforskrifta § 4-1.

Det betyr at du må gi beskjed dersom bustaden blir teken i bruk igjen, leigd ut eller brukt på annan måte i fritaksperioden.

Eigarskifte i fritaksperioden

Dersom eigedommen blir tinglyst på ny eigar i ein pågåande fritaksperiode, blir fritaket oppheva frå og med månaden etter tinglysingsdatoen. Frå same tidspunkt blir renovasjonsgebyret fakturert etter gjeldande satsar.

Dersom eigedommen blir tinglyst på ny eigar før det har gått seks månader frå fritaket tok til, er vilkåret om minst seks månaders fritaksperiode ikkje oppfylt. Tidlegare eigar blir då fakturert renovasjonsgebyr for perioden fritaket har vore innvilga.

Når fritaksperioden går ut

Når fritaksperioden er over, må abonnenten sjølv bestille nytt oppsamlingsutstyr dersom bustaden skal takast i bruk igjen.

Dersom forholda som gav grunnlag for fritak framleis gjeld, må det sendast inn ny søknad før fritaksperioden går ut. Fritaket blir ikkje automatisk forlenga.

Dersom du ikkje har fått innvilga fritak, blir renovasjonsgebyret fakturert som vanleg, uavhengig av kor mykje bustaden blir brukt.

Så lenge ØyVAR ikkje har dokumentasjon på at bustaden eller bueininga står tom i meir enn 6 månader, har ØyVAR heimel til å krevje inn renovasjonsgebyr, sjølv om renovasjonstenesta ikkje blir brukt.

Slik søker du

Søknad om fritak må sendast skriftleg via vårt elektroniske søknadsskjema.

Søknad om fritak frå renovasjonsgebyr

I søknaden må du gi nødvendige opplysningar og leggje ved relevant dokumentasjon som viser at vilkåra for fritak er oppfylte.

Dersom du ønsker å forlenge eit innvilga fritak, må du sende inn ny søknad. Forlenging skjer ikkje automatisk, og søknadsskjema må fyllast ut på nytt.

Mangelfulle eller ufullstendige søknader kan føre til lengre saksbehandlingstid.

Normal behandlingstid er inntil tre veker.

Klage

Dersom du får avslag på søknaden, eller meiner at vedtaket er feil, kan du klage. Informasjon om klagefrist og korleis du går fram, finn du i vedtaksbrevet.