Under halvparten har lagra drikkevatn heime

Publisert: 27.10.2025

Denne veka markerer vi Eigenberedskapsveka 2025. Over halvparten av befolkninga, 54 prosent, seier at dei er lite eller ikkje godt førebudde på å klare seg sjølve i heimen i ei veke dersom straum, vatn eller kommunikasjon blir borte. Det viser ei undersøking frå Direktoratet for samfunnstryggleik og beredskap (DSB).

I 2024 vart råda for eigenberedskap oppdaterte. Tidlegare var rådet å ha beredskap for tre dagar, no skal vi kunne klare oss i ei heil veke. Det handlar om å vere førebudd på alt frå ekstremvêr og straumbrot til digitale angrep, pandemi, sabotasje og i verste fall krig.

56 prosent av dei spurde i undersøkinga svarar at dei har tenkt gjennom kva dei vil gjere ved bortfall av straum, 22 prosent har jodtablettar heime og 32 prosent har styrkt eigenberedskapen det siste året. Talet på kor mange som har lagra drikkevatn heime, 47 prosent, har vore det same sidan 2023, viser undersøkinga frå januar i år.

Ha nok vatn på lager

Kvar person bør ha minst 20 liter drikkevatn tilgjengeleg. Du treng ikkje kjøpe vatnet. Springvatn i reingjorde behaldarar er godt nok.

Slik gjer du det:

Vask flaskene eller dunkane med oppvaskmiddel og vatn, og skyl godt.
Tilset to korkar hushaldningsklorin per 10 liter vatn. Lat det stå i minst 30 minutt før du skyl godt.
Fyll flaskene heilt fulle med kaldt vatn frå springen. Lat vatnet renne til det er kaldt før du fyller.
Oppbevar vatnet mørkt og kjøleg. Då kan det lagrast i årevis.
Få deg ein beredskapsvenn

Eigenberedskap handlar ikkje berre om kva du har sjølv, men òg om å hjelpe kvarandre. Mange er villige til å dele lager og ressursar. Heile 75 prosent seier dei gjerne vil dele med nære relasjonar. Ein «beredskapsvenn» kan vere ein nabo, slektning eller ven du avtalar med om å støtte kvarandre dersom ei krise oppstår.

Sjekkliste for eigenberedskap

DSB tilrår at du har følgjande i husstanden:

Varme og lys

Varme klede, pledd, dyner eller soveposar
Fyrstikker og stearinlys
Ved dersom du har vedomn eller peis
Gass- eller parafinomn som er berekna på bruk innandørs
Avtale om overnatting dersom du ikkje har alternativ oppvarming
Lommelykter eller hovudlykter som går på batteri, sveiv eller solceller

Informasjon

DAB-radio som går på batteri, sveiv eller solceller
Batteri og opplada batteribank
Liste på papir med viktige telefonnummer (naudnummer, legevakt, veterinær, familie, vener og naboar)

Legemiddel og hygiene

Legemiddel og førstehjelpsutstyr
Jodtablettar (gjeld barn og vaksne under 40 år, gravide og ammande)
Hygieneartiklar som våtserviettar, handsprit, bleier, toalettpapir, bind og tampongar