Slik handterer og leverer du asbest trygt

Asbest vart mykje brukt i bygningar, til dømes i eternittplater på tak og veggar eller i golvbelegg, fram til det blei forbode i 1980. Materialet er sterkt, branntrygt og slitesterkt, men også helseskadeleg. Når asbest brest eller blir broten opp, kan det frigjerast små fiber som du ikkje ser. Desse fibera kan vere svært skadelege å puste inn.

Det er difor viktig at du handterer asbest på ein forsvarleg måte, også når du skal levere det på gjenbruksstasjonen. Stasjonsleiar Richard Saure ved Midtstegen gjenbruksstasjon forklarar deg i videoen korleis du gjer det.

Dersom asbesten ikkje er forsvarleg pakka inn, kan vi ikkje ta imot han. Då må du ta han med heim igjen og pakke på nytt.

Slik pakkar du:

• Bruk to lag plast: fuktsperre eller byggplast.
• Teip alle skjøtar godt slik at pakken blir heilt forsegla.
• Lever på gjenbruksstasjonen.
• Vi merkar pakken tydeleg med «asbest» når han kjem inn på gjenbruksstasjonen.

Her kan du lese meir om pakking av asbest.

Det er gratis å levere asbest opp til eitt tonn. Har du meir, må du betale eit gebyr.

Ver forsiktig når du handterer asbest

Er du i tvil om materialet inneheld asbest? Handsam det som om det er asbest, og ta kontakt med fagfolk dersom du treng hjelp.

Her kan du lese Arbeidstilsynet si rettleiing om verneutstyr og tryggingstiltak når du skal handtere asbesthaldig materiale.

Med rett pakking og trygg levering tek du vare på både deg sjølv, renovatørane våre og miljøet.